بەپێی بڕیارێكی ئەنجومەنی دادوەری ئاڵوگۆڕێك ئەنجامدراوە بۆ سەرۆكی دادگای تێهەڵچونەوەی ناوچەی هەولێر، بەڵام ئەم بڕیارە بەپێی زانیاری و بەڵگە یاساییەكان وا بانگەشە دەكرێت گرفت و كێشەی یاسایی لەشێوازو دەرچونی بڕیارەكە هەیە، سەرباری رێزی یەكجار زۆرم بۆ دادوەرە بەڕێزەكان و سەرۆكی ئەنجومەنی دادوەریی كە بە ئەزمون و شارەزان، بەڵام نەدەبو دەرچواندنی بڕیارەكە دەرئەنجامی رادەست نەكردن و رێگری لەئاڵوگۆری لێبكەوێتەوە چونكە زیانی گەورەی بۆ سەربەخۆیی دەسەڵاتی دادوەری و پێگە و گەورەییان دەبێت.

بەڵام لەمە كارەساتبارتر، نوسراوێك لە سەرۆكایەتی داواكاری گشتیەوە ئاڕاستەی ئەنجومەنی دادوەری كراوەگوایە بڕیارەكە نایاساییەو وەك نەبون (معدوم) وایە و هیچ بەهایەكی یاساییان نیە، ئەم نوسراوە دەستوەردانی راستەوخۆیە بۆ دەسەڵاتی دادوەری، لە تایبەتمەندی و دەسەڵاتی داواکاری گشتی نییە نوسراوی لەو چەشنە بكات و رای نایاساییبون لەو بڕیارە بدات، چونکە داواکاری گشتی سەر بە وەزارەتی داد و دەسەڵاتی جێبەجێکردنە، ئەرك و دەسەلاتی خۆیی هەیە جیاواز لە دەسەڵاتی دادوەری.

وەلێ ئەم بڕیاری ئاڵوگۆرە گەر هەر لایەنێك پێی نایاساییە و زەررمەندە لە دەرچواندنی دەتوانێ لە دادگای كارگێری داوای هەڵوەشانەوەی بڕیارەكە بكات، چونکە بڕیاري ئیداری و یاسایی كە دەرچوێنرا یا لایەنەكە خۆی پاشگەزدەبێتەوە و هەڵیدەوەشێنێتەوە یا بەبڕیاری دادگا، هەمو ئەم روداوانە پێمان دەڵێت دۆخی دادگا و دەسەڵاتی دادوەری لە چ قەیرانێكی قوڵ و ئاشكرادایە، بەم روداوانە بێ متمانەی بەدادگا و دەسەڵاتی دادوەری زیاتر و زیاتر دەكات لای هاوڵاتیان و دامەزراوە فەرمیەكان و  وڵاتانی دنیا.

پێویستە كاراكتەرەكانی ئەم دەسەڵاتە خۆیان زیاتر لەخەمی دادگا و دەسەڵاتی دادوەریدا بن، چونکە حیزبە دەسەڵاتدارەکان و فەرمانڕەواكانی هەرێم، ئەوەی خەمی نەخۆن و گوێی پێنەدەن ناو و ناوبانگ و گەورەیی و پێویستی ئەم دامەزراوە دادوەریانەیە،كە لای ئێمە دەسەڵاتێکی یەكجار گرنگن و پیرۆزن و خۆمان بەخەمخۆریان دەزانین.