وا حەوت ساڵە هەمو (19ـی ئایار)ـێك یادی پڕسوێی مەرگی پیاوێکی گەورەی نیشتمان دەکەینەوە کە رەوانشاد (نەوشیروان مستەفا)ـیە، مێژو و سەرگوزوشتەی ئەم مرۆڤە زیاترو گەورەترە تەنها پەیوەست بكرێت بەبونیاد و ناوی بزوتنەوەی گۆڕانەوە، بۆیە رەوانشاد وەک کارەکتەرێکی کاریزمی و سیاسیەکی حەکیمی نیوسەدە خەباتی کورد لە باشور ناکرێت تەنها بکرێتە موڵكی گۆڕان یان یەكێتی یان ناوچەیەکی بەرتەسک و شارێکی دیاریکراو، چونکە ئەو بەشێکی دانەبڕاوی مێژوی گەلەکەمانە، یادكردنەوە و پیشاندانی دید و تیروانین و قوربانیدان و نیشتیمانپەروەری و دڵسۆزیەكەی نەبۆ پیرۆزكردنە نەبۆ فرۆشتنەوەی خەبات و تێكۆشانیەتی بەمیلەت، بەپێچەوانەوە بۆ رێگریكردنە لەو هەوڵەی دەیانەوێت مێژوی ئەو پیاوە داگیربكەن لە رۆڵ و هەوڵی كەسانی تركەم بكەنەوە، بۆ سوپاس و پێزانینە بۆ خەباتی شاخ ودڵسۆزی شاریی، بۆ بەردەوامیدان و كاركردنە بەدیدو تێروانینەكانی و وننەكردنی بەرنامەكانیەتی.. چونکە لە ئێستادا نەك تەنها مێژوی رەوانشاد (نەوشیروان مستەفا) بگرە مێژوی سەركردەكان تر لەبەردەم ترسی داگیركاری خەبات و مێژویاندایە.

لەزەمەنێكدا یادی کۆچی دوایی رەوانشاد دەكەینەوە دۆخی خەڵك لەڕوی ئابوریەوە زۆر خراپە و هەرێمی كوردستان پەرلەمانی نەماوە و قورسایی وپێگەی لاواز بوە، ئەو کاروان و حزب و وێستگە سیاسیانەی کاک نەوشیروان لەرابردوکاری لێکردون متمانەی كەمبۆتەوە لای جەماوەر کە سوچی کاک نەوشیروانی تێدانیە، نەیارە سیاسییەکانی رەوانشاد بەویست و ئارەزوی خۆیان چارەنوسمان بەرەو نادیاردەبەن، هیچ گومان لەوە نیە ئەگەر کۆچکردو ئامادەیی هەبوایە لەم دۆخەی ئێستای هەرێمی كوردستان زۆرینەی ئەو پاشەكشێ و قەیرانانەی بونیان هەیە ڕویان نەدەدا، بەڵام خەمی قوڵ و گەورە ئەوەیە، بزوتنەوەی گۆڕان ئەو حزب و بزوتنەوەیەی زۆر هەوڵ و قوربانی بۆدا لە ئێستادا لەزۆر بوار و پرسدا شوناس و پێناسەی لەسەر ئاستی كرداری ونكردوە، بۆیە هیچ چارێكمان نیە دەبێت ئەم دۆخە تێیپەرێنین و ڕێگە نەدەین چیتر دواین پرۆژەی سیاسی رەوانشاد بەبێ كاریگەری ولاوازی بمێنێتەوە، لەدەرئەنجامدا كەس و دۆست و ئازیزانی دڵسۆز و خەمخۆرنین بەرامبەر مێژوی پڕ شەرفمەندانەی شۆرش خەباتی مەدەنی ناوبراو بەپێچەوانەوە خەمساردی وكەمتەرخەمی بونی هەیە..

ئەوەی ماوە بوترێت ئێستاش بۆ بەهێز بونەوەی گۆڕان و پاراستنی قەوارەی هەرێم و گێڕانەوەی ئینتیما بۆ نیشتمان و ئاشتكردنەوەی خەڵك پێویستمان بە دنیا بینی و بۆچون و عەقڵە گەورەكەی كاك نەوشیروان هەیە.