کاتی خۆی رەوانشاد (نەوشیروان مستەفا) بە نوسین و بە قسە و لەدیدارەکانیدا لەگەڵ ئابوری سەربەخۆ و فرۆشتنی نەوتدا بو، بەڵام بەو مەرجەی گرێبەستەکان ئاشكراو شەفافبن و لەژێر چاودێری پەرلەمان بن و داهاتەکەشی بۆ بەرژەوەندی خەڵک و فەرمانبەران و ئاوەدانکردنەوەی کوردستان وپرۆژەی خزمەتگوزاری بێت.

هەروەها بە ئاشكرا، کاک نەوشیروان وتی "بۆ ئه‌وه‌ی حکومه‌تی هه‌رێم له‌م ململانێیه‌دا له‌گه‌ڵ‌ حکومه‌تی ناوه‌ندیدا به‌هێز بێت، ئه‌بێ پشت ئه‌ستور بێ به‌ پشتیوانی خه‌ڵک، بۆ ئه‌وه‌ی پشتیوانی خه‌ڵک به‌ ده‌س بهێنێ، ئه‌بێ له‌ هه‌مو هه‌نگاوه‌کانی دا له‌ رۆشنایی دا به‌ ئاشکرا کار بکا"، ئەم بۆچونانەی كاك نەوشیروان بنەما و دنیابینی بزوتنەوەی گۆڕان بوە لەڕابردو، بەڵام دەسەڵاتدارانی هەرێم (پارتی بەپلەی یەكەم ویەكێتیش) نەچونە ژێر باری ئەو مەرجانەوە و گرێبەستەکان، نەك پەرلەمان و خەڵك تەنانەت لە سەرکردایەتی و مەکتەب سیاسیەکانی خۆشیان شاردوەتەوە و چەند کەسێک لەسەر ئاستی باڵا نەبێت، کەس ئاگاداری ئەو مەلەفە هەستیارە نیە.

پاشان لە ژێر پەردە و پاساوی ئابوری سەربەخۆدا، پارەی نەوت بوە هۆی ئەوەی قاسەی حیزب و كۆمپانیای حیزبیان دەوڵەمەندتر بێت لەسەر حسابی حكومەت، هێزی چەكدار و میدیای جۆراوجۆریان دامەزراند و خستەكار بۆ لێدان لەحیزبە ڕكابەرەكانیان، بە كوردی و بە كورتی نەوت خێر وبەرەكەتی نەهێنا، ئێستاش بۆتە چەقی ململانێ و دەستبادان لەگەڵ حكومەتی عێراق، بەتایبەت دوای دەرچونی بڕیاری دادگای فیدراڵی و ئێستاش كەرەستەیەكی باشە بۆ زیاتر فشاركردنی لایەنە سیاسیەكانی عێراق، حكومەتی هەرێم و پارتی بەپلەی یەكەم و ئێستاش یەكێتی كە بەراستی ناڕونی وردبینی نیە لەبۆچونیان، كەوتونەتە دەستبادان و ململانێ لەگەڵ بەغداد، هەرچەندە حكومەتی عێراق رۆژ لە دوای رۆژ هەنگاو بۆ جێبەجێكردنی بڕیاری دادگای فیدڕاڵی و تەنگەتاو كردنی كۆمپانیاكان.

ھەربۆیە پێویستە بزوتنەوەی گۆڕان پێداگر و بەردەوام بێت لەسەر تێڕوانیەكانی كاك نەوشیروان، چونکە سیاسەتی نەوتی هەرێم بەم شێوازەی ئێستا مایەی ئەوەنیە پارێزگاری لێبكرێت و ستایش بكرێت، بە پێچەوانەوە ئەوان كە ئامادەی دروستكردنی سندوقی داهاتە نەوتیەكان نەبن، ئامادەی ئاشكراكردنی گرێبەستەكان نەبن، ئامادەی شەفافكردن و گێرانەوەی كۆی داهاتی نەوت نەبن بۆ خەزێنەی گشتی كەئێستا 50%ی دەگەڕێتەوە، زیاتر لەوەش ئامادەی ئەوەنەبون ئەنجومەنی نەوت و گاز كۆببیتەوە تا رێژەی زۆرینەیان مسۆگەركرد، پاشان لەم دۆخە هەستیار و خراپەدا ئامادەی ڕێكەوتن نەبن لەگەڵ بەغداد (تسلیم بون ناڵێن)، هیچ پاسا و هۆكارێكی لۆژیكی و نیشتیمانی و سیاسی نابینن بۆ پاریزگاریكردن لەم شێوازە مامەڵەیە، بۆیە پێویستە ئێمە رایەكی راشكاوانەتر و جیاوازترمان هەبێ لەسەر ئاستی عێراق و هەرێمی كوردستان بۆ پرسی نەوت، هەر وەك ئەو هەڵوێستەی فراكسیۆنی گۆران هەیبوو لەدەنگ نەدان بەهەمواری یاسای نەوت و گاز، هەمو ئەم ڕاو بۆچونانەش لەوپەڕی خەمخۆریە بۆ خەلك و قەوارەی هەرێم، ناكرێت وا لێكبدریتەوە دژایەتی كردنی حكومەت و قەوارەی هەرێمە، چونکە بەرژەوەندیە باڵاكانی میلەت هاوتانیە لەگەڵ بەرژەوەندی حیزبی..