لەئیستادا پرۆژەی دەستورى هەرێم بۆتە پرسێك، پارتی دیموكراتی كوردستان چ كاتێكی بوێت دەیکاتە پرسی سیاسی و هەر وەختێكیش نەیەوێت خامۆشی دەكات، بەشێوەیەک پارتى هەمیشە وەك كەرستەیەكی سیاسی و حزبی تەواو لەم پرسەی روانیوە كە رەهەندێكی نیشتیمانی هەیە، وائێستاش لە نێو پەرلەمان جارێکى دیکە هێناویەتیتەوە بەرباس كە ئەمە چەندین جارە بێ سود وبێ دەرئەنجام دەوروژێنرێت.

ئێمە وادەیبینین دەستور پرسێكە پێویستی بەسازانی نیشتیمانی و هێنانەكایەی دۆخ و كەشێكی ئارامی سیاسی هەیە لە نێوان لایەنە سیاسییەكان، پێویستە پرۆژەی دەستور خاڵی کۆكەرەوەی هەموان بێت، چونکەدەستور بۆ تاك بەتاكی هەرێمی كوردستانە، بۆ رۆژو دوو رۆژ نیە بەڵكودەبێتە گرێبەستێكی هەمیشەی و بەئاسانی ناگۆرێت، بۆیە ناكرێت بە عەقلیەتی كەمینەو زۆرینەی ساختە مامەڵەی لەگەڵ بكرێت.

پرۆژەی دەستور كات و زەمینە سازی پێشوەختەی پێویستە، بۆیە بەبێ ئەو هەنگاوانە پێشبینیكراوە دەستوریش ببێتە خاڵی ناكۆكی و جیاوازی زیاتری نێوان لایەنە سیاسییەكان و کۆمەڵانی خەڵكی كوردستان، ئێمە دەمانەوێت دەستورێكی نیشتمانی رێزلێگراو بێت لای خەلك و هێزە سیاسییەكان، نەك وەك زۆبەی یاساكان نە جێبەجی دەكرێن نە رێزیان لێدەگیرێت، بۆیە ئەگەر وانەكەین هەم رێژەی بەژداری بۆ راپرسی و دەنگدان كەم دەبێت، هەم دواتر هێزی پابەندكاری نابێت بۆ ئەو هەموو نایاسایی وپێشلكارانەی ئەنجام دەدەرێن، ئەمەش پێویستی بە هێنانەكایەی دۆخێكی ئارام وملدان بۆکۆمەڵێ گۆرانکاری ودەستەبەركردنی ماف وئازادییەكان وكەمكردنەوەی رۆڵی حیزب وسازشى لایەنە سیاسییەكان و سەقامگیری دۆخ و دەرونی کۆمەڵگا هەیە، دەنا وەك پرسی ریفراندۆم پێشبینی كراوە ببێتە خاڵی جیاكەرەوە و ناكۆكی نێوان لایەنە سیاسییەكان، چونکە ناكرێت وەك یاسایەكی ئاساییی لێیی بروانین، لەم زەمەنەدا بێ متمانەیەكی گەورەوبۆشایەكی زۆر هەیە لەنێوان هاوڵاتی و لایەنە سیاسییەكان و دۆخی دارایی ودەرونی كۆمەڵگا بۆ پرسی گشتی زۆر خراپە.